كوڤارا داڤنشی كوڤاره‌كا وه‌رزیه‌ ئێكەم ھژمارا وێ ل گۆلانا سالا 2019 ھاتیە وەشاندن، داكو ببیته‌ کوڤاره‌كا ئەکادیمی یا هاریكار و پشته‌ڤان ژبۆ زه‌نگینكرنا زانیاری و ژێده‌را ب بەرھەمێن لوكال ونێڤده‌وله‌تی یێن گرێدای ب هه‌ر بواره‌كێ هەژی خواندنێ و لێنێرینێ. کوڤارا داڤنشی یا دەستویردایە ژلایێ سەندیكا رۆژنامەنڤیسێن كوردستانێ، ھژمارا وێ د تومارا یاسایی دا (908). بێ گومان تەکنۆلۆجیا پێزانینا پرانیا دەمێ مە گرتیە، وه‌کریە ئەم ژ خواندنا چاپه‌مه‌نیێن كاغه‌زی دویر بكه‌ڤین. مه‌ ئه‌ڤ كوڤاره‌ وه‌شاند وه‌ك به‌شداریه‌ك د پاراستنا كه‌لتورێ وه‌شانێن كاغه‌زی كو بهێنه‌ بكارهینان و هه‌لگرتن ب شێوازێ دیكیومێنتێن فیزیكی، سه‌رباری یێن دیجیتالی. هه‌ول دده‌ین هزر و پرسگرێکێن جیهانی و زانستی بۆ خوینده‌ڤانان به‌رده‌ست بكه‌ین، شیانێن لوكال و ناڤنەتەوی د کوڤارێ دا به‌شدار بكه‌ین دویر ژنه‌ژاد و كه‌لتور و تاگیری وبه‌كره‌وه‌ندێ وان، دەرفەتەکێ ژبۆ نڤیسکار، ھزرڤان، لێکۆلینەر، ھونەرمەند، ھەلبەستڤان، فەیلەسوف و داھێنەران پەیدا بکه‌ین، دا کو بەرھەمێن خوە یێن هزری، مه‌عریفی و زانستی پارڤە بکه‌ن. زانین ب تنێ به‌س نینه‌، دڤێت وێ زانینێ جێبه‌جێبكه‌ین. حه‌ز و ئاره‌زو به‌س نینه‌، دڤێت بكه‌ینه‌ كریار.